മോഹന്‍ലാല്‍ സൂപ്പര്‍ സ്റ്റാര്‍ രജനികാന്തിനൊപ്പം അഭിനയിക്കുമെന്ന് കഴിഞ്ഞ ദിവസങ്ങളില്‍ വാര്‍ത്ത പുറത്ത് വന്നിരുന്നു. രജനി കാന്തിന്റെ ഏറ്റവും പുതിയ ചിത്രമായ ജയിലറിലാണ് മോഹന്‍ലാല്‍ അഭിനയിക്കുക. ദിവസങ്ങളായി നീണ്ടുനിന്ന ചര്‍ച്ചകള്‍ക്കൊടുവില്‍ സിനിമയുടെ നിര്‍മ്മാതാക്കളും ഇക്കാര്യം ഔദ്യോഗികമായി പ്രഖ്യാപിച്ചിരിക്കുകയാണ്.
ഇരുവരും ഒന്നിക്കുന്ന ആദ്യ ചിത്രമാണ് ജയിലര്‍. നിര്‍മ്മാതാക്കളായ സണ്‍ പിക്‌ചേഴ്സാണ് ഇത് സംബന്ധിച്ച വിവരങ്ങള്‍ പുറത്ത് വിട്ടത്. ചിത്രത്തിലെ ഒരു സ്റ്റില്ലും നിര്‍മ്മാതാക്കള്‍ ട്വിറ്ററിലൂടെ പുറത്തുവിട്ടിട്ടുണ്ട്. അരക്കൈയന്‍ പ്രിന്റഡ് ഷര്‍ട്ടും പ്ലെയിന്‍ ഗ്ലാസും കൈയില്‍ ഇടിവളയുമായി സ്‌റ്റൈലിഷ് ഗെറ്റപ്പിലാണ് ചിത്രത്തില്‍ മോഹന്‍ലാല്‍ എത്തുന്നത്.
ചിത്രത്തില്‍ മോഹന്‍ലാലിന് ഏതാനും ദിവസത്തെ ചിത്രീകരണം മാത്രമാകും ഉണ്ടാകുക. ചിത്രത്തില്‍ നിര്‍ണായകമാകുന്ന അതിഥി വേഷത്തിലാണ് താരം എത്തുന്നതെന്നാണ് വിവരം. തമിഴിലെ യുവസംവിധായകന്‍ നെല്‍സണ്‍ ദിലീപ്കുമാറാണ് ജയിലര്‍ ഒരുക്കുന്നത്.
ജയിലറുടെ വേഷത്തിലാണ് രജനികാന്ത് എത്തുന്നത്. ശിവരാജ്കുമാര്‍,? രമ്യ കൃഷ്ണന്‍, വിനായകന്‍ തുടങ്ങിയവരും ചിത്രത്തില്‍ പ്രധാന കഥാപാത്രങ്ങളായി എത്തുന്നുണ്ടെന്നാണ് വിവരം. അനിരുദ്ധ് രവി ചന്ദറാണ് സംഗീതം. ഛായാഗ്രഹണം വിജയ് കാര്‍ത്തിക് കണ്ണന്‍ എന്നിവരാണ്.
