ലോകത്ത് പലരും ഗിന്നസ് റെക്കോര്‍ഡുകള്‍ സ്വന്തമാക്കിയിട്ടുണ്ട്. എന്നാല്‍ പ്രായത്തിന്റെ കാര്യത്തില്‍ ഗിന്നസ് റെക്കോര്‍ഡ് നേടിയിരിക്കുകയാണ് ബോബി എന്ന നായ. 1992-ല്‍ പോര്‍ച്ചുഗലിലെ ലീറിയയിലാണ് ബോബി ജനച്ചത്. ബോബിയുടെ ഇപ്പോഴത്തെ പ്രായം 30 വയസ്സും 266 ദിവസവുമാണ്. ഇതിലെ കൗതുകം എന്താണെന്നാല്‍ ശരാശരി നായ്ക്കളുടെ ആയുസിന്റെ ഇരട്ടിയില്‍ കൂടുതലാണ് ഇത്.
ഇതാണ് ഗിന്നസ് റെക്കോര്‍ഡ് ബോബിയെ തേടി എത്തുവാന്‍ കാരണം. ബോബിയുടെ ഉടമ ലയണല്‍ കോസ്റ്റ ബോബിയുടെ ആയുസിന്റെ രഹസ്യം തുറന്ന് പറയുന്നു. സാധാരണ പോലെ ബോബിയെ ചങ്ങലയിട്ട് തളച്ചിരുന്നില്ല. ബോബി കറങ്ങി നടക്കാറുണ്ടെന്നും ധാരാളം മൃഗങ്ങളും മനുഷ്യരുമായി ഇടപെടാറുണ്ടെന്നുമാണ് ലയണല്‍ കോസ്റ്റ പറയുന്നത്. ദിവസവും ഒരു ലിറ്റര്‍ വെള്ളം കുടിക്കുന്ന ബോബി. വീട്ടിലെ ആളുകള്‍ കഴിക്കുന്ന അതേ ഭക്ഷണം തന്നെയാണ് കഴിക്കുന്നത്.
